1989-cu ildən fəaliyyət göstərən "Yuğ" Dövlət Teatrındakı tamaşalarda söz və dialoqdan minimum istifadə edilir. Aktyorlar tamaşaçılarla daha çox musiqi, hərəkət və mimlərlə ünsiyyətdə olur. Çox vaxt zaldakı seyrçilər də tamaşaların iştirakçısına çevrilir.

Azərbaycan milli dramaturgiyasında musiqili komediya janrı xüsusi yer tutur. Bünövrəsi Üzeyir Hacıbəyli tərəfindən 1909-cu ildə qoyulan bu janrda myuzikl və komediya prinsiplərinin maraqlı vəhdətini görmək olar. Teatrın truppası Azərbaycan və rus bölmələrində çalışır. Burada Avropa və rus bəstəkarlarının operettaları da tamaşaya qoyulur.

"Üns" Yaradıcılıq Səhnəsi 2006-cı ildə yaradılıb. Azərbaycanın zəngin mədəniyyətinə əsaslanaraq tamaşaçıları dünyada gedən müasir teatr prosesləri ilə tanış etmək, ənənə və yeniliyin mükəmməl sintezini göstərməkdə "Üns" Yaradıcılıq Səhnəsinin rolu əvəzsizdir. Teatrın tamaşaları yüksək bədii estetik xüsusiyyətləri, səhnə prinsipləri və orijinallığı ilə seçilir. Tamaşaçılar Rusiya kinosunun və teatrının yaşayan əfsanələri, dünyanın ən populyar musiqi qrupları və orkestrləri ilə məhz bu məkanda görüşüb. Daima özünəməxsus layihələrlə tamaşaçılarını heyrətləndirən "Üns" Yaradıcılıq Səhnəsində müxtəlif ölkələrdən dəvət olunan rejissor və aktyorların iştirakı ilə müştərək tamaşalar hazırlanır.

Dövlət Pantomima Teatrı Azərbaycanın sənət mühitində ilk və hələlik yeganə pantomima teatrıdır. 1994-cü ildən teatr-studiya kimi formalaşan heyət bu vaxtadək beynəlxalq əhəmiyyəli çoxsaylı festivalların qalibi və iştirakçısı olub. Teatr truppası özünəməxsus aktyor oyunu və plastikası ilə seçilir. Yaradıcı heyət dünya teatrlarının repertuarında yerini möhkəmləndirən klassik əsərləri cəsarətlə öz üslubuna uyğun tərzdə səhnəyə gətirir. Teatr səhnəsində aktyorların və rejissorların ideyası, eləcə də yerli dramaturqların əsərlərinin motivləri əsasında da özünəməxsus tamaşalar nümayiş etdirilir.

Heydər Əliyev sarayı ən mötəbər tədbirlərin ünvanına çevrilib. Əsaslı təmir-bərpa və yenidənqurma işlərindən sonra 2008-ci ildə tamaşaçıların ixtiyarına verilib. Saray bir sıra xüsusiyyətlərinə görə digər tamaşa və konsert müəssisələrindən fərqlənir. Xüsusi sifarişlə gətirilmiş yüksək keyfiyyətlərə malik LED ekranları və pianino, royal, televizor, rabitə qovşaqı ilə təchiz olunan qrim otaqları (2-si VİP otaqlardır) həm tamaşaçılara, həm də burada çıxış edən qonaqlara rahatlıq və xoş saatlar vəd verir.

1998-ci ildən musiqi ictimaiyyətinin sevimli məkanına çevrilən Muğam Teatrı Azərbaycanın qədim memarlıq incisi-İçərişəhərin mərkəzində yerləşir. Bura gələn qonaqlar milli musiqidən zövq almaqla yanaşı, Azərbaycan mətbəxinin ən ləziz təamlarından da dada bilərlər. Milli ornament və naxışlarla bəzədilən fərqli interyeri onu hər zaman paytaxt sakinlərinin və qonaqların diqqət mərkəzində saxlayır.

Açıq səma altında 2500 tamaşaçını qonaq edən bu unikal məkanda çoxsaylı festivallar və kütləvi-mədəni tədbirlər keçirilir. Yaşıl Teatr Konsert Kompleksin ərazisini bütünlüklə əhatə edən yaşıllıq, fəvvarə və şəlalə burada təşkil olunan hər konsertə xüsusi əhval-ruhiyyə bəxş edir.

Teatr 1967-ci ildə yaradılıb. Binada əsaslı təmir-bərpa işləri aparılsa da, onun əvvəlki memarlıq üslubu qorunub saxlanılıb və milli ornamentlərlə daha da zənginləşdirilib. 214 nəfərlik zal ən müasir avadanlıqlarla təchiz olunub. Teatrın repertuarı bu gün Üzeyir Hacıbəyli, Qara Qarayev, Fikrət Əmirov, Cahangir Cahangirov, Rauf Hacıyev, Tofiq Quliyev, Polad Bülbüloğlu, Ramiz Mirişli, Faiq Sücəddinov, Azər Dadaşov və digər bəstəkarların əsərlərindən ibarətdir.

Azərbaycan Dövlət Filarmoniyasında 7 kollektiv fəaliyyət göstərir. Bunlar Azərbaycan Azərbaycan Dövlət Simfonik Orkestri, Azərbaycan Dövlət Xor Kapellası, Q.Qarayev adına Azərbaycan Dövlət Kamera Orkestri, Azərbaycan Dövlət Fortepiano Triosu, Azərbaycan Dövlət Simli Kvarteti, F.Əmirov adına əməkdar kollektiv, Azərbaycan Dövlət Mahnı və Rəqs ansamblı və bu kollektivin nəzdində fəaliyyət göstərən Azərbaycan Dövlət Xalq Calğı Alətləri orkestridir. Oz daxilində fəaliyyət gostərən kollektivlərdən əlavə, burada xarici ölkələrdən gələn məşhur solistlərin çıxışları mütəmadi olaraq təşkil edilir.